ПО спектакуларниот прв натпревар од полуфиналето, кога Манчестер Сити и Реал Мадрид ја воодушевија планетата со седум гола (4:3), реваншот кој го следеа сите љубители на фудбалот (и Ѓоковиќ и Надал на лице место) беше уште повеќе спектакуларен. Во финалето на мегдан на Ливерпул мина „кралскиот клуб“.
Само фудбалот може да го подготви ова. Ваков спектакл не се гледа секој ден. „Граѓаните“ беа видени во финалето, а потоа „Сантијаго Бернабеу“ експлодираше во размак од една минута.
Во поголемиот дел од натпреварот немаше многу возбудувања, но финишот на натпреварот беше вистинско уживање за неутралните навивачи. Се играше во 73. минута кога Ријад Марез го совлада Тибо Куртоа. Алжирецот доби одлично додавање од Бернардо Силва и со удар од прва ја заби топката во противничката мрежа.
А тоа што се случуваше во последните минути од натпреварот е тешко да се опише. Се чинеше дека англискиот клуб ќе оди во финалето, но така не мислеше Родриго, кој најпрвин му донесе израмнување на Реал во 90. минута по асистенцијата на Карим Бензема. Сепак, ниту тоа не беше доволно за „кралевите“ да поминат, туку резултатот што се запиша на семафорот само една минута подоцна беше доволен за продолженија.
Родриго повторно го матира Едерсон. Брилијантно скокна и со глава по центаршут на Марко Асенсио стана херој на домашните навивачи.
Треба да се каже дека Сити можеше се да заврши на само неколку минути пред израмнувачкиот гол на домашните. Џек Грилиш се обиде од левата страна, но Ферлан Менди ја расчисти топката од гол-линијата.
Реал продолжи да напаѓа и во продолжението. Таквата игра вроди со плод во 94. минута. Рубен Диас го собори Бензема во шеснаесетникот на ривалот. Судијата Даниеле Орсато немаше дилема и покажа на белата точка. Французинот беше согурен и со новиот гол предизвика делириум на трибините.
Малку недостасуваше домашната публика да се смири во првото продолжение. Гостите имаа одлична шанса. Најпрво Фил Фоден шутираше со глава, а Куртоа фантастично реагираше, топката се одби до Фернандињо, кој од тешка позиција не можеше да го совлада Белгиецот.
До крајот на натпреварот немаше многу возбудувања. Реал ја задржа предноста и закажа ново финале во најелитното фудбалско клупско натпреварување, а ривал ќе им биде Ливерпул кој во вторникот го победи Виљареал.
Фото: Принтскрин/Instagram
МОЖЕБИ ЌЕ ВЕ ИНТЕРЕСИРА:
