Студентите излегуваат на протест прес македонското собрание. Тие денеска под мотото „Стоп за уништување на студентскиот стандард“, во 16 часот ќе излезат со барање за подобри студентски услови. Здружението „Студентски отпор“ реши протестот да се одржи и покрај тоа што власта ги повлече измените на Законот за студентски стандард, а со кои се предвидуваше кратење на групите на студенти што добиваат надомест за дневен студентски оброк.
Во 16 и 30 часот студентите треба да се сретнат со министерот за образование Јетон Шаќири и со пратениците предлагачи на измените на Законот за студентски стандард.
„Студенстки отпор“ бара повлекување на предложените измени на Законот за студентски стандард, изедначување на стипендиите со повискиот износ, изземање на студентите од антикризните мерки на Владата за рационализација и штедење на струја и подобрување на условите и итна санација каде што е неопходна во студентските домови.
-Со децении наназад студентот од Македонија е жртва на лошите политики и институционалната пасивност. Крајно време е да се спротиставиме на уништувањето на студентскиот стандард. Затоа, време е за студентски отпор, велат од Студентски отпор.
Демократскиот сојуз, преку соопштение, вчера побара Собранието да одржи итна седница на која ќе се расправа за студентскиот стандард и другите проблеми со кои се соочуваат студентите и да се донесат конкретни решенија преку интегрално прифаќање на нивните барања.
Со соопштение вчера се огласи и Левица, која го поддржува протестот на студентите. Партијата тврди дека во Предлог-буџетот се скратени 140 милиони денари од ставката „Студентски стандард”. Според оваа партија, објавата на Зајкова од ЛДП дека се повлекува законот, како што велат, е манипулативна, затоа што, според неа, испаѓа дека таа не ни знаела каков предлог-закон поднесува.
Инаку, предлагачи на измените на Законот за студентски стандард се пратеничките Жаклина Лазаревска и Санела Шкриељ од СДСМ и Моника Зајкова од ЛДП.
МОЖЕБИ ЌЕ ВЕ ИНТЕРЕСИРА:
