Член на обезбедувањето на премиерот Христијан Мицкоски доби условна казна затвор поради семејно насилство врз својата сопруга, откако во судска постапка ја признал вината за делото што му се става на товар.
Станува збор за Раде Ристовски, кој според информациите од Основниот кривичен суд Скопје е осуден на една година и шест месеци затвор. Сепак, станува збор за условна осуда, што значи дека казната нема да биде извршена доколку во следните три години не стори ново кривично дело.
Според обвинението, инцидентот се случил по претходна вербална расправија во семејниот дом. Ристовски најпрво физички ја нападнал сопругата, удирајќи ја во пределот на лицето и главата, а сето тоа се случувало во присуство на нивната малолетна ќерка.
Обвинителството наведува дека насилството продолжило, при што обвинетиот ја фатил жената за вратот и почнал да ја дави. Во нападот таа се здобила со телесни повреди и претрпела психичка траума.
Според обвинението, жената успеала да се засолни во тоалетот, а подоцна се обидела заедно со ќерката да го напушти домот. Во тој момент, како што се наведува, Ристовски ѝ го одзел и оштетил мобилниот телефон. По инцидентот, таа заедно со детето побарала помош кај сосетка, која ги примила во својот дом.
По пријавувањето на случајот, Ристовски бил приведен и му бил определен притвор, а судската постапка завршила со признание на вината и изрекување условна затворска казна.
МОЖЕБИ ЌЕ ВЕ ИНТЕРЕСИРА:
