Администрацијата на претседателот на САД, Доналд Трамп, е подготвена да разгледа предлог што би му овозможил на Иран да задржи „симболични“ капацитети за збогатување на ураниум, под услов Техеран целосно да се откаже од можноста за развој на атомска бомба, објави Axios, повикувајќи се на високи американски функционери.
Иако постои мала можност за договор, американските претставници велат дека евентуалниот компромис би морал да исполни многу високи стандарди за да ги убеди скептиците во администрацијата на Трамп и во Израел.
– Претседателот Трамп ќе биде подготвен да прифати договор што е суштински и што може политички да го продаде дома. Ако Иранците сакаат да спречат напад, треба да ни дадат понуда што не можеме да ја одбиеме. Ако играат игри, нема да имаме многу трпение – изјавиле американски функционери.
Според американски и израелски извори, разликите меѓу Вашингтон и Техеран остануваат длабоки, а прагот за прифаќање на иранскиот предлог е висок.
Висок советник на Трамп, цитиран од „Аксиос“, нагласил дека претседателот „сè уште не одлучил да нападне Иран“, додавајќи дека можностите остануваат отворени.
На Трамп му биле претставени и воени опции што вклучуваат директно таргетирање на врховниот лидер Али Хамнеи и неговиот син Моџтаба.
Во меѓувреме, претставниците на Трамп во индиректните разговори со Иран, Стив Виткоф и Џаред Кушнер, побарале од Техеран детален писмен предлог што ќе ги адресира загриженостите на САД.
Иранскиот министер за надворешни работи, Абас Арагчи, изјавил дека нацрт-предлогот ќе биде финализиран во наредните два до три дена и дека треба да биде „договор од кој сите добиваат“. Можно е во надзорот на програмата да биде вклучен и шефот на Меѓународната агенција за атомска енергија, Рафаел Гроси.
Американските претставници порачуваат дека одлуката за понатамошните чекори на Вашингтон ќе зависи од содржината на иранскиот предлог, со јасна порака дека „топката е во нивниот двор“.
МОЖЕБИ ЌЕ ВЕ ИНТЕРЕСИРА:
