Венецуелската опозициска лидерка Марија Корина Мачадо јавно го пофали американскиот претседател Доналд Трамп поради апсењето на венецуелскиот лидер Николас Мадуро, јави ДПА.
„Трети јануари ќе остане запишан во историјата како ден кога правдата ја победи тиранијата“, изјави Мачадо во интервју за Фокс њуз.
Според информациите, американските сили во ноќта меѓу петокот и саботата извршиле напади врз цели во Венецуела, при што биле уапсени Мадуро и неговата сопруга Силија Флорес. Тие биле префрлени во САД, каде што се соочуваат со судски постапки поврзани со наводни обвиненија за трговија со дрога.
Мачадо и претходно го поддржуваше тврдокорниот пристап на Трамп кон Венецуела. Во објава на социјалната мрежа Х, таа оцени дека станува збор за „пресвртница“, која не е значајна само за венецуелскиот народ, туку и за слободата, човечкото достоинство и демократијата во поширок контекст. Таа додаде дека Венецуела во иднина може да стане клучен сојузник на САД во областа на безбедноста, енергетиката, демократијата и човековите права.
По апсењето на Мадуро, Мачадо побара за претседател на земјата да биде назначен опозицискиот кандидат Едмундо Гонзалез Урутија. Според опозицијата и дел од меѓународните набљудувачи, тој победил на претседателските избори во 2024 година, кои беа проследени со сериозни обвинувања за изборни нерегуларности.
Гонзалез Урутија се кандидираше откако на Мачадо ѝ беше забрането учество на изборите. Во меѓувреме, Трамп изјави дека таа нема да има водечка улога во идниот политички процес во Венецуела, оценувајќи дека нема доволна поддршка и почит во земјата.
По овие настани, заменик-претседателката лојална на Мадуро, Делси Родригез, положи заклетва како вршител на должноста претседателка. Нејзината влада и натаму го смета Мадуро за легитимен шеф на државата.
МОЖЕБИ ЌЕ ВЕ ИНТЕРЕСИРА:
