Со дел од 26-те мерки за заштита на животниот стандард и ликвидноста на компаниите, за заштита на животниот стандард, како и мерките за финансиска поддршка на деловните субјекти, цената на дизел-горивото, наместо 85,5 денари, колку што изнесува сега, ќе се намали 10,5 денари и треба да изнесува 75 денари, а бензинот, наместо 91,5 денар, ќе се намали 11,5 денари и треба да изнесува 80 денари, велат од Владата преку допис до медиумите.
Овие намалувања на цените на бензините и другите нафтени деривати произлегуваат од мерката за намалување на стапката на ДДВ од 18 на 10 % при промет на енергентите: дизел, безоловен бензин, гасно масло, течен нафтен гас (ТНГ) и метан, како и од мерката за намалување на акцизата врз основа на берзанските цени.
Со намаленото ДДВ за нафтените деривати практично се намалува цената на енергентите за граѓаните, со што имаме заштита на животниот стандард, од една страна, а преку мерката се зголемуваат ликвидноста и солвентноста на компаниите од друга, и со намалувањето на акцизите се заштитува куповната моќ на потрошувачите со директно влијание врз малопродажната цена на овие енергенти, и тоа за приближно 1,2 денар, односно 2,3 денара, односно 4,7 денари, вклучувајќи го и ефектот од намален износ на ДДВ за износот на намалена акциза.
Дополнително, со мерката за ослободување од плаќање ДДВ при увоз на природен гас и електрична енергија, топлинска енергија или енергија за разладување, се ослободуваат увозниците на природен гас и електрична енергија, топлинска енергија или енергија за разладување од плаќање данок на додадена вредност при увоз на овие добра, со што се овозможува подобрување на ликвидноста и на профитабилноста на компаниите.
