Мисијата на Меѓународниот монетарен фонд (ММФ) во земјава даде зелено светло за доделување 530 милиони евра на Македонија преку кредитната линија за претпазливост (во рок од 24 месеци. На располагање годинава ќе бидат 110 милиони, соопшти Министерството за финансии.
Премиерот Димитар Ковачевски пред неколку дена изјави дека очекува „позитивна вест“ од ММФ и кредитори за нови заеми со кои Владата ќе ја пребродува економската и енергетската криза. Од првично планираното задолжување, кое во државниот буџетот за годинава беше одредено на 787 милиони евра, со ребалансот од летово сумата за заеми речиси се удвои, на 1,5 милијарди евра, што е речиси една третина од вкупниот буџет за годинава (4,4 милијарди евра).
– Ова е големо признание за економските политики кои се спроведуваат во земјава, бидејќи Фондот овој финансиски инструмент го наменува само за земји со здрави економски фундаменти и со здрави политики, информираа вчера од Министерството за финансии.
По финалното одобрување на овој инструмент од страна на Бордот на ММФ, кое се очекува во текот на овој месец, на нашата земја веднаш ќе и бидат ставени на располагање 110 милиони евра за финансирање на буџетските потреби и за полесно соочување со шоковите кои ги донесе енергетската и ценовната криза.
– Самата намена на инструментот е да пружи ликвидноста поддршка на здрави економии во време на шокови и кризи, каква што е тековната глобална ситуација, појаснуваат од Министерството за финансии.
Премиерот Димитар Ковачевски синоќа во емисијата 24 анализа во врска со заемот од ММФ истакна дека најпрвин како влада биле критикувани долг период дека не може да ги привршат преговорите со ММФ.
– Тоа бевме обвинувани од опозицијата и се потврди дека е без основа, и од постигнатиот договор, се гледа дека од добрите економски политики, стабилната и фискална и моментарна политика, ММФ го одобри овој инструмент. Тој ќе биде исплаќан оваа година, идната и наредната година и каматата е помеѓу 1 и 2 отсто, а потоа сукцесивно оди враќањето, како што заздравува буџетското функционирање на државата. Овој инструмент се користи за поддршка на буџетот и девизните резерви, рече Ковачевски.
Во изјавата на мисијата на ММФ се дава признание и на заложбите на Владата за понатамошно спроведување на фискалната консолидација, како и реформите во јавните финансии, пред се новиот Закон за буџети и фискалните правила кои ќе придонесат во оваа насока.
– Пристапот до овој финансиски инструмент, испраќа силни сигнали од страна на ММФ за домашната економија на меѓународните пазари и инвеститори. Имено при одобрувањето, покрај позитивната оцена за економијата од последната мисија на Фондот во земјава, ММФ ги оценува и фискалната политика, монетарната политика, стабилноста и супервизијата на финансискиот сектор и соодветноста на податоците. Оваа линија значи доверба во економијата и политиките кои се спроведуваат во земјата, велат од Министерството за финансии.
МОЖЕБИ ЌЕ ВЕ ИНТЕРЕСИРА:
