Судијката Снежана Марковска, која му изрече 12 години затворска казна на Васил Јованов за смртта на Фросина Кулакова, донесе ослободителна пресуда за неговиот татко, Зоран Јованов.
Според образложението на Судот, дејствијата што му се ставаа на товар на обвинетиот не ги исполнуваат законските елементи на кривичното дело загрозување на безбедноста на сообраќајот од член 298 од Кривичниот законик.
Судот оценил дека кривичната одговорност не може да се темели само на фактот дека обвинетиот бил сопственик на возилото, додека со него управувало друго полнолетно лице кое немало возачка дозвола.
Во пресудата се наведува дека ваквото однесување е предвидено како прекршок во Законот за безбедност на сообраќајот на патиштата и не може да се третира како кривично дело преку пошироко толкување на законските одредби.
Судот дополнително истакнал дека повторувањето на прекршочни дејства само по себе не создава кривична одговорност доколку не се исполнети сите законски услови за постоење на кривично дело.
Според судската оценка, непосреден причинител на сообраќајната несреќа е возачот кој самостојно управувал со возилото. Во образложението е нагласен и принципот на индивидуална кривична одговорност, според кој последиците од постапките на едно полнолетно лице не можат автоматски да му се припишат на друго лице само поради роднинска врска или сопственост на возилото.
Пресудата сѐ уште не е правосилна, а странките имаат право на жалба пред Апелациониот суд.
МОЖЕБИ ЌЕ ВЕ ИНТЕРЕСИРА:
