Истражување спроведено од Универзитетот во Анкара, Турција, открива дека мачките мјаукаат значително почесто на мажите отколку на жените, што може да укажува на тоа дека мажите се помалку внимателни и дека мачките се обидуваат да го привлечат нивното внимание.
Во студијата биле анализирани однесувањето на 31 мачка и нивните сопственици. Мачките во просек мјаукале 4,3 пати во првите 100 секунди кога ги поздравувале мажите, во споредба со само 1,8 пати кога ги поздравувале жените, според извештај на The New York Times.
Причината зошто мачките мјаукаат повеќе на мажите, според истражувачите, е што мажите можеби помалку им обрнуваат внимание на своите миленици, па мачките го засилуваат своето мјаукање за да ја привлекат нивната грижа. Жените, пак, имаат тенденција да обрнуваат повеќе внимание на мачките и подобро ги разбираат нивните емоции, што ја намалува потребата од мјаукање.
За време на истражувањето, биле користени 22 различни мерки за однесување и биле следени демографските фактори кои може да влијаат на однесувањето на мачките. Резултатите покажале дека мачките најчесто ги поздравуваат мажите, додека други демографски фактори немале значителен ефект врз честотата или времетраењето на поздравувањата.
Истражувачите наведуваат дека поздравувањето на мачките е мултимодално и може да одразува различни мотивациски или емоционални состојби, кои можат да се менуваат во зависност од надворешни фактори, како што е полот на лицето што се грижи за нив.
Ова истражување ја нагласува важноста од разбирањето на комуникацијата и однесувањето на мачките. Познавањето на овие однесувања може да им помогне на сопствениците подобро да ги разберат своите миленици и да ја зајакнат врската со нив.
МОЖЕБИ ЌЕ ВЕ ИНТЕРЕСИРА:
