Во Тиват денеска ќе се одржи Самитот ЕУ – Западен Балкан под мотото „Заеднички просперитет и стабилност на Европската Унија и Западен Балкан“, при што главен акцент ќе биде ставен на процесот на проширување на Унијата.

Со самитот ќе претседава Антонио Кошта, кој во изминатиот период ги посети земјите од регионот. Домаќин на настанот е Јаков Милатовиќ.

На собирот ќе учествуваат и Урсула фон дер Лајен, Каја Калас и Роберта Мецола.

Според најавите, лидерите на земјите од Западен Балкан и Европската Унија ќе разговараат за проширувањето, како и за Планот за раст на регионот. Се очекува ЕУ уште еднаш да ја потврди својата силна и недвосмислена поддршка за европската перспектива на земјите од Западен Балкан.

На агендата ќе се најдат и прашања поврзани со справувањето со заедничките предизвици, зајакнувањето на безбедноста и отпорноста во услови на сè посложени геополитички околности, како и продлабочувањето на соработката во областа на надворешната, безбедносната и одбранбената политика.

Самитот претставува дел од спроведувањето на Стратешката агенда на Европски совет за периодот 2024–2029 година.

Самитите ЕУ – Западен Балкан се организираат од 2018 година, а последниот ваков состанок се одржа минатата година во Брисел.