„Утринава на состанокот на коалицијата беше договорено Саборот да се распушти во четврток на 14 март. Пред распуштањето на Саборот ќе се донесе нов пакет мерки за цените на струјата и природниот гас. На сите ќе им обезбедиме мирно лето и време за формирање на ново мнозинство и влада“, рече Пленковиќ.
Претходно Пленковиќ најави дека Саборот ќе се распушти најдоцна на 22 март и дека парламентарните избори ќе се одржат пред изборите за Европскиот парламент. Одлука за закажување избори донесува претседателот на Републиката, а од денот на влегувањето во сила на одлуката до денот на изборите мора да поминат најмалку 30, а не повеќе од 60 дена. Најрано изборите во недела може да се одржат на 14 април. Изборите може да се одржат и на 21 април, 28 април, 5 мај и 12 мај, забележуваат хрватските медиуми. Кога точно ќе се одржат, одлучува претседателот на републиката Зоран Милановиќ, кој го свикува Саборот на првата седница. /МИА