Во низата амандмани кон Предлог-Буџетот за 2026 година, Левица побара да се зголеми буџетската ставка за биомедицински потпомогнато оплодување за дополнителни 5 милиони евра. Причината е едноставна, велат од партијата, Македонија се соочува со пад на наталитетот, а една од причините е и здравствената дисфункција која спречува многу семејства да добијат свое дете.
Во такви услови, програмата за ин-витро мора да биде засилена, а не оставена да запаѓа во бирократска летаргија.
Пратеникот и потпретседател на Левица, Реџеп Исмаил – Хактан, посочи дека и покрај тоа што Фондот за здравствено осигурување нуди ваучери, самите корисници и понатаму плаќаат речиси половина од целата процедура од свој џеб. Според него, тоа ја поништува суштината на програмата и наместо вистинска поддршка, станува само делумна помош што за многу семејства е финансиски недостижна.
-Зголемувањето на средствата е првиот чекор кон поправичен и функционален систем, кој ќе им го олесни товарот и ќе им даде реална шанса на семејствата што најмногу ја чувствуваат оваа борба.
Сепак, владејачкото мнозинство предводено од ДПМНЕ без дебата, го одби и овој амандман. Наместо да изберат политика што навистина го поттикнува наталитетот, избраа да ги игнорираат реалните потреби на граѓаните и докажаа дека нивните грижи и мантри за наталитетот се само празни зборови или десничарски диктаторски чинови со коишто на граѓаните, без обезбедување на соодветни услови и можности, им наредуваат да имаат повеќе деца, порачаа од Левица преку соопштение.
МОЖЕБИ ЌЕ ВЕ ИНТЕРЕСИРА:
