Во Атика, поширокиот регион на Атина, денеска се затворени сите основни и средни училишта поради силното невреме „Бајрон“, кое предизвика обилен дожд, поплавени улици и сериозни проблеми во градот. Противпожарната служба само до 6 часот утрово примила 290 повици за помош, со десетици интервенции за испумпување вода и сечење дрвја.
Најмногу дожд паднал во западна и северна Атика, со над 100 литри на квадратен метар на места, додека во другите делови на Атина се регистрирани меѓу 15 и 35 литри.
Наставата ќе се одвива онлајн, а државните службеници кои не можат да стигнат на работа поради поплавите добија дозвола да останат дома. На неколку булевари сообраќајот е во прекин, особено во западните предградија Неа Перамо, Мегара и Мандра, кои повторно се најтешко погодени.
Жителите добија итни предупредувања преку бројот 112 да избегнуваат подруми и приземни простории и да се држат на безбедни локации. Пораки за претпазливост се испратени и во други делови на Грција. Невремето „Бајрон“ се очекува да продолжи до утре наутро.
МОЖЕБИ ЌЕ ВЕ ИНТЕРЕСИРА:
