Министерство за надворешни работи на Русија изрази сериозна загриженост и остро ги осуди американските воени напади врз Венецуела, оценувајќи ги како недозволиво мешање во внатрешните работи на суверена држава.
Во официјалното соопштение се наведува дека Латинска Америка треба да остане зона на мир и стабилност, а на Венецуела мора да ѝ се гарантира правото самостојно да ја одредува својата иднина, без надворешни притисоци. Информацијата ја пренесе ТАСС.
Русија ја поддржа иницијативата за свикување итна седница на Совет за безбедност на ОН, нагласувајќи дека аргументите со кои САД ги оправдуваат нападите се неосновани и опасни. Од Москва предупредуваат дека е неопходно да се спречи понатамошна ескалација и кризата да се решава исклучиво преку политички дијалог.
„Руската Федерација ја потврдува својата солидарност со народот на Венецуела и ја поддржува политиката на нејзиното легитимно водство насочена кон заштита на суверенитетот и територијалниот интегритет на земјата“, се наведува во соопштението.
Од руското МНР додаваат дека Москва е подготвена да даде поддршка на дијалогот меѓу спротивставените страни во Венецуела. Засега, според официјалните информации, нема податоци за руски државјани кои настрадале во настаните.
Претходно, претседателот на САД, Доналд Трамп, изјави дека американските сили извршиле „успешна голема операција“ во Венецуела и дека венецуелскиот претседател Николас Мадуро бил заробен и изнесен од земјата заедно со неговата сопруга.
„Операцијата беше спроведена во координација со американските безбедносни служби“, напиша Трамп во објава на социјалната мрежа Truth Social.
МОЖЕБИ ЌЕ ВЕ ИНТЕРЕСИРА:
