Ниските температури што во попладневните и вечерните часови го зафатија Полошкиот Регион предизвикаа замрзнување на коловозите, поради што за краток временски период се регистрирани вкупно 19 сообраќајни незгоди, информираа од Центар за управување со кризи.
Во тетовскиот реон се случиле четири сообраќајни незгоди, од кои една верижна со учество на 10 возила, додека на подрачјето на Гостивар биле евидентирани 15 сообраќајки.
Од ЦУК појаснуваат дека две незгоди се случиле на автопатот Тетово–Гостивар, една на локалниот пат Пирок–Боговиње и една на правецот Тетово–село Требош. За уште една сообраќајна незгода не бил побаран увид.
Од ПС Гостивар се пријавени 15 сообраќајни незгоди, од кои за 10 бил извршен увид, додека за останатите пет страните постигнале договор. Истовремено, до надлежните служби пристигнале бројни пријави од жители на Тетово, Гостивар и околните населени места за замрзнати локални и споредни улици.
Регионалниот центар за управување со кризи во Тетово стапил во контакт со општините Тетово, Гостивар и Желино, од каде било потврдено дека фирмите за зимско одржување се ангажирани и дека се врши посолување на патиштата според приоритети. Во Тетово бил активиран и Кризниот штаб, при што било интервенирано на повеќе локални сообраќајници.
Од секциите на Македонија пат во Тетово, Попова Шапка и Гостивар информираат дека континуирано се на терен и вршат посолување на автопатите и регионалните патишта. Поради снежни врнежи, на патниот правец Лисец–Попова Шапка е воведена задолжителна употреба на зимска опрема.
МОЖЕБИ ЌЕ ВЕ ИНТЕРЕСИРА:
