Речиси 40.000 евра изнесува вкупната вредност на 22 казни што инспекциските служби на Агенција за храна и ветеринарство (АХВ) ги изрекоа на оператори со храна, во рамки на вонредните контроли спроведени во маркети и хипермаркети низ целата држава.
Како што информираат од АХВ, акцијата се реализирала во периодот од 13 до 16 јануари, при што биле извршени вонредни надзори кај вкупно 188 оператори со храна од оваа категорија.
Кај 10 оператори биле утврдени полесни прекршувања од областа на безбедноста на храната, меѓу кои несоодветно одржување на разладни уреди, како и нејасни или нечитки декларации на производите. За овие прекршоци биле изречени мерки – опомени. Во два маркета, пак, било констатирано дека вработените немаат поседувано санитарни книшки.
Дополнително, кај шест маркети инспекторите утврдиле дека не се имплементирани процедури за примена на Добра производствена и Добра хигиенска пракса, додека кај 14 објекти била затекната храна со изминат рок на траење.
Во рамки на контролите, како небезбедни биле одземени и нештетно уништени над 253 килограми храна, меѓу кои месо и преработки од месо, млечни производи, кондиторски производи и друга храна.
МОЖЕБИ ЌЕ ВЕ ИНТЕРЕСИРА:
