Бугарските власти истражуваат серија убиства поврзани со еколошка невладина организација, при што полицијата разгледува повеќе можни верзии за настаните, вклучително и сомневања за поврзаност со култ.
На почетокот на февруари беа пронајдени три тела во планинска куќа во близина на превојот Петрохан, објект кој бил во сопственост на невладината организација. По овој случај, полицијата издаде потерница по три лица, меѓу кои и директорот на организацијата и сопственик на куќата, Ивајло Калушев, за кого се веруваше дека избегал од местото на настанот.
Според бугарските медиуми, подоцна Калушев, едно 15-годишно момче и 22-годишен маж биле пронајдени мртви во кампер во шумска област. Телата случајно ги открил овчар. Полицијата веднаш го обезбедила подрачјето и започнала истражни активности, но засега нема официјални детали за овој нов развој на случајот.
Вршителот на должноста главен обвинител Борислав Сарафов претходно изјави дека случајот е исклучително необичен и шокантен, споредувајќи го со настани од телевизиската серија „Твин Пикс“. Тој посочи и дека постојат сомневања оти организацијата се обидувала самостојно да презема активности кои вообичаено се во надлежност на државните институции.
На 4 февруари полицијата потврди дека трите првично пронајдени тела имале прострелни повреди. Обдукцијата покажала дека поминале околу 12 до 18 часа од настанот до нивното откривање. Во близина на речиси изгорената планинска куќа биле пронајдени и поголемо количество оружје и опрема за надзор.
Според истрагата, објектот бил силно обезбеден со огради, камери, бариери и дронови. Лицата кои престојувале таму тврделе дека ја штитат шумата и животната средина, но истражителите проверуваат сомневања дека организацијата можеби функционирала како затворена група со елементи на култ, во која биле вклучени и млади лица.
МОЖЕБИ ЌЕ ВЕ ИНТЕРЕСИРА:
