Општина Центар попладнево соопшти дека нејзините инспекциски служби заедно со екипа на Министерството за внатрешни работи излегле на терен по инцидентот на булеварот „Митрополит Теодосиј Гологанов“, во близина на Католичката црква, каде што на градилиште настанало свлечиште на земја.
При тоа биле оштетени делови од околната инфраструктура, како и паркирано возило во непосредна близина.
Од Општината информираат дека по извршениот увид било констатирано оштетување на коловозот, тротоарот, канализациската мрежа и уличното осветлување. Веднаш биле изречени казни и санкции за инвеститорот поради непочитување на обврските и предизвиканата штета врз јавната инфраструктура.
Истовремено, екипи на Општина Центар презеле мерки за обезбедување на локацијата, при што се поставени сигурносни појаси и предупредувачки ленти со цел заштита на граѓаните.
Од Општината порачуваат дека нема да се толерира несовесно и неодговорно постапување од инвеститори кога е загрозена безбедноста на граѓаните.
Во меѓувреме, инвеститорот е задолжен итно да го обезбеди просторот и да преземе мерки за санација и заштита.
Инцидентот, кој го потврди и МВР, се случил кога бил затрупан и багер на градилиштето, при што работникот што управувал со него навреме успеал да излезе и да се спаси.
МОЖЕБИ ЌЕ ВЕ ИНТЕРЕСИРА:
