Украинскиот претседател Володимир Зеленски на 4 јуни му испрати отворено писмо на рускиот претседател Владимир Путин, предлагајќи директна средба со цел да се постигне прекин на огнот и да се отвори пат кон завршување на војната. Ова е првпат од почетокот на целосната руска инвазија во 2022 година Зеленски директно да му се обрати на Путин преку писмо.
Во писмото, кое украинскиот претседателски кабинет го споделил и со сојузниците, меѓу кои и САД, Зеленски побарал да се утврди конкретен датум за средба меѓу двајцата лидери.
„Лидерите ги решаваат клучните прашања. Така било отсекогаш и така ќе остане“, наведува Зеленски, истакнувајќи дека директниот дијалог меѓу претседателите е најкраткиот пат до можен договор.
Одговор од Кремљ пристигна уште истата вечер. Портпаролот Дмитриј Песков изјави дека Зеленски може „во секое време“ да дојде во Москва, но додаде дека Путин сè уште не го видел писмото.
Во своето обраќање, Зеленски нагласил дека и покрај поволниот однос на загуби во корист на Украина, секој изгубен човечки живот претставува болна загуба.
„Ние во Украина не сакаме бескрајна војна. Свесни сме дека животот без војна е неспоредливо подобар“, напишал украинскиот претседател, додавајќи дека верува оти и голем дел од руските граѓани би поддржале крај на борбите.
Писмото содржело и јасни пораки поврзани со воената состојба. Зеленски посочил дека украинската јавност позитивно реагирала на неодамнешните операции на украинските беспилотни летала на голема далечина, при што бил споменат и лет подолг од 1.000 километри поврзан со отворањето на економски форум во Санкт Петербург.
Во завршниот дел од писмото, Зеленски ги отфрлил руските тврдења за НАТО и за заштитата на рускиот јазик како причини за војната, оценувајќи ги како изговори.
„Оваа војна е твој личен избор, војна без вистинска причина. Така ќе те памети историјата“, порачал Зеленски, додавајќи дека Путин поминал речиси половина од своите 26 години на власт во конфликти поврзани со Украина.
МОЖЕБИ ЌЕ ВЕ ИНТЕРЕСИРА:
