Државниот завод за ревизија (ДЗР) даде неповолно мислење за финансиските извештаи на Јавното претпријатие „Паркинзи на Општина Центар“ (ПОЦ) за 2024 година, при што утврди низа сериозни слабости во финансиското работење и управувањето со средствата.
Освен неповолното мислење за точноста и објективноста на финансиските извештаи, ревизорите изразиле и мислење со резерва во однос на усогласеноста на работењето на претпријатието со законските прописи.
Во извештајот на ДЗР се наведува дека ПОЦ неправилно ја евидентирало опремата и градежните објекти, вклучително паркомати, монтажни конструкции, киоск-системи и друга урбана опрема. Ревизорите констатирале и дека не била пресметана амортизација за материјалните средства ставени во употреба во текот на 2024 година.
Дополнителен проблем е што претпријатието немало усвоено сметководствени политики, завршните книжења не биле направени во законскиот рок, а трговските книги не биле заклучени, што оставало можност за последователни измени на податоците.
Според ревизорскиот извештај, ПОЦ има побарувања во вредност од 80,1 милион денари, односно околу 1,3 милиони евра. Од нив, повеќе од 20,4 милиони денари или околу 332 илјади евра се побарувања постари од шест години, за кои не биле преземени навремени активности за наплата, ниту пак било извршено нивно обезвреднување.
ДЗР утврдил неправилности и при отписот на побарувања од физички лица во вредност над 2,2 милиони денари. За овој износ не бил пресметан и платен данок на личен доход, со што, според ревизорите, државниот буџет бил оштетен за околу 247 илјади денари.
Забелешки има и во делот на исплатата на платите, бидејќи бил применуван правилник кој не бил усогласен со законската регулатива и со Општиот колективен договор за јавниот сектор.
Ревизорите посочиле слабости и во благајничкото работење. Имено, немало интерен акт за управување со готовината, не се водел благајнички дневник, а не биле воспоставени ниту соодветни мерки за заштита на финансиските средства. Дополнително, внатрешната ревизија функционирала без стратешки и годишен план.
Еден од посериозните наоди се однесува на неплатените обврски за комунална такса. До крајот на 2024 година, ПОЦ имало долг од 86,3 милиони денари, односно околу 1,4 милиони евра, средства кои не биле уплатени во Буџетот на Општина Центар. Најголем дел од долгот се однесува на периодот од 2019 до 2023 година.
ДЗР утврдил недостатоци и во постапките за јавни набавки. Во дел од тендерите биле поставувани услови кои не биле соодветни и пропорционални, биле прифаќани понуди над проценетата вредност без доволна анализа и обезбедени средства, а техничките спецификации биле недоволно јасни.
Ревизорите констатирале и доцнење при објавувањето на известувањата за склучени договори во електронскиот систем за јавни набавки, што претставува дополнителна слабост во транспарентноста на работењето на претпријатието.
МОЖЕБИ ЌЕ ВЕ ИНТЕРЕСИРА:
