Непознато лице во неделата, на 11 јануари, фрлило непознат предмет кон зградата на Амбасадата на Бугарија во центарот на Скопје, при што била искршена влезната врата. Ова го покажуваат фотографиите објавени од Министерството за надворешни работи на Бугарија, кои беа проследени со остра реакција од Софија.
Во официјалното соопштение, бугарското МНР го осуди инцидентот, оценувајќи го како напад врз самата држава Бугарија и симболот на нејзиното официјално присуство во земјава. Од таму наведуваат дека станува збор за сериозно нарушување на статусот на дипломатската мисија и грубо кршење на Виенската конвенција за дипломатски односи.
Софија изрази и длабока загриженост поради, како што наведуваат, недоволната реакција на надлежните институции во Република Северна Македонија на претходни напади и вандализам врз објекти поврзани со Бугарија и бугарската заедница. Според бугарското МНР, ваквата институционална пасивност, заедно со толерирањето на говор на омраза, создава средина во која ваквите инциденти се охрабруваат и ескалираат.
Во соопштението се наведува дека Бугарија очекува македонските власти да го идентификуваат сторителот, да го изведат пред лицето на правдата и да ја гарантираат безбедноста на бугарските дипломатски и конзуларни претставништва, нивниот персонал и имотот.
Исто така, се нагласува дека Софија очекува институциите во Северна Македонија јасно да се дистанцираат од говорот на омраза, ефикасно да се спротивстават на ваквите кривични дела и да работат на создавање поинаков јавен наратив во односите меѓу двете земји, во согласност со меѓународните обврски.
Од Министерството за надворешни работи на Северна Македонија засега нема официјална реакција за инцидентот, ниту пак е објавено соопштение од полицијата со детали за настанот.
МОЖЕБИ ЌЕ ВЕ ИНТЕРЕСИРА:
