Кубанските власти започнаа постепено враќање на снабдувањето со електрична енергија по „целосниот колапс“ на националната мрежа, втор ваков инцидент во рок од неколку дена. Официјална Хавана ја насочи вината за кризата кон долгогодишното нафтено ембарго од страна на Соединетите Американски Држави.
Струјата во текот на денот беше делумно обновена, при што околу две третини од главниот град повторно добија електрична енергија. Сепак, претходно речиси сите 10 милиони жители на Куба останаа без струја поради тотален дефект на мрежата – седми ваков случај во последните 18 месеци.
Причината за колапсот, според техничките извештаи, е дефект во термоцентралата „Нуевитас“, што предизвикало верижна реакција и пад на целиот систем. Енергетската инфраструктура на Куба се базира на застарени капацитети, од кои дел работат повеќе од четири децении, што ја прави мрежата исклучително ранлива.
Владата тврди дека санкциите од Соединетите Американски Држави го отежнуваат одржувањето и модернизацијата на системот. Од друга страна, независни економисти предупредуваат дека проблемот лежи и во долгорочниот недостиг на инвестиции.
Дополнителен удар за енергетскиот сектор е намаленото снабдување со нафта од Венецуела, која традиционално е главен партнер на Куба. Ситуацијата се комплицира и со најавите од администрацијата на Доналд Трамп за санкции кон земјите што би испорачувале нафта на островот.
Од Хавана возвратија дека ваквите политики претставуваат обид за економско „задушување“ на земјата, која се соочува со ембарго уште од 1962 година.
МОЖЕБИ ЌЕ ВЕ ИНТЕРЕСИРА:
