Германија само што го сопрела вакцинирањето со многу оспоруваната вакцина на “AstraZeneca”.
Веста за прекинот на вакцинацијата со “AstraZeneca” ја објави германското министерство за здравство, а пренесува “DPA”. Германија е уште една земја во Европа која ја сопре употребата на оваа вакцина.
Одлуката е донесена на основа на препораките на институтот “Паул Ерлиц”, во кои се наведува дека е потребно да се спроведат дополнителни проверки дали оваа вакцина е поврзана со појавата на крвно згрутчување.
Потсетуваме, Данска, Ирска, Бугарија, Норвешка, Исланд, Тајланд и Холандија привремено ја сопреа вакцинацијата со вакцината на “AstraZeneca”. Италија, Австрија, Естонија, Литванија, Луксембург и Летонија ја сопреа вакцинацијата со серијата која е дистрибуирана во 17 земји.
Германската канцеларка Ангела Меркел пред три недели кажа дека вакцината на “AstraZeneca” е безбедна, но дека таа не би се вакцинирала со неа, пренесува “Index.hr”.
Во интервју за “Frankfurter Allgemeine zeitung”, германската канцеларка признала дека оваа вакцина во главно е одбиена од луѓето, бидејќи се загрижени поради нејзината делотворност и безбедност, што сепак е последица на лошиот публицитет.
“Постои проблем со прифаќањето на вакцината на “AstraZeneca”. Станува збор за добра вакцина, безбедна и делотворна. Одобрена е од “EMA”, а во Германија им се препорачува на помладите од 65 години. Сите релевантни авторитети ни велат дека станува збор за вакцина на која може да и се верува. Во момент кога нема доволно вакцини, не можеме да бираме со која ќе се вакцинираме”, рекла Меркел.
На прашањето дали и самата би се вакцинирала со “AstraZeneca”, Меркел рекла: “Јас имам 66 години и не влегувам во групата за која е препорачана оваа вакцина”.