Премиерот Христијан Мицкоски повтори дека Владата останува на ставот оти Македонија нема да презема нови обврски во евроинтегративниот процес без јасно дефиниран план, конкретни гаранции и прецизна перспектива за завршување на патот кон Европската Унија.
Одговарајќи на новинарски прашања поврзани со позициите на европските партнери и ставовите на Бугарија, Мицкоски изјави дека не очекува промена во политиките на официјална Софија во блиска иднина.
„Не очекувам променет став од Софија, особено во период кога новата влада таму се наоѓа во политички меден месец. Очекувано е дел од внатрешните политички прашања да се префрлаат на вакви теми, со цел да се прикажат како заштитници на националните интереси“, изјави премиерот.
Тој нагласи дека Македонија располага со силни аргументи и дека државата ќе продолжи доследно да ги брани своите позиции како на домашен, така и на меѓународен план.
„Ќе победиме и дома и надвор. Нашите аргументи денес се јасни, прецизни и силни. Продолжуваме со реализација на реформската агенда и остануваме целосно усогласени со Европската Унија во делот на надворешната и одбранбената политика“, рече Мицкоски.
Премиерот посочи дека претседателот на Европскиот совет, Антонио Кошта, потврдил дека Македонија бележи напредок во повеќе клучни области, меѓу кои реформите, владеењето на правото, јавната администрација и спроведувањето на акцискиот план за малцинствата.
Според него, доколку се отстрани политичката пречка која моментално стои на патот кон европската интеграција и се обезбеди јасна перспектива за членство, Владата е подготвена да ги исполни сите останати обврски.
„Сѐ останато што зависи од нас како влада ќе биде реализирано. Ние сме вистински предводници во процесот, а не оние што само формално се претставуваат како такви“, изјави Мицкоски.
Тој нагласи дека Владата нема намера да влегува во процеси кои немаат јасен исход и гарантиран резултат.
„Никогаш нема да влеземе во процес без претходно да имаме јасно утврден план и перспектива. Најважно е што ќе оставите зад себе и дали вашите одлуки ќе бидат во интерес на граѓаните и државата“, порача премиерот.
Во завршницата од своето обраќање, Мицкоски упати критики кон политичките противници, истакнувајќи дека членовите на актуелната влада влегле во политиката со личен интегритет и одговорност.
„Ние сме луѓе кои влегле во политиката со интегритет и со желба да придонесат за државата. Нашата цел е да вратиме дел од изгубеното и да создадеме подобра иднина, а не дополнително да ја ослабиме позицијата на Македонија“, изјави премиерот.
МОЖЕБИ ЌЕ ВЕ ИНТЕРЕСИРА:
