Во Собранието денеска ќе се одржат седници на повеќе собраниски комисии, на чиј дневен ред се законски предлози од областа на образованието, одбраната, надворешната политика, како и прашања поврзани со еднаквите можности.
Комисијата за образование, наука и спорт ќе разгледува три предлог-закони во прво читање – Законот за високото образование, Законот за обезбедување квалитет во високото образование и науката, како и Законот за научноистражувачката дејност.
Со истите предлог-закони ќе се занимава и Законодавно-правната комисија, која ќе даде мислење за нивната усогласеност со правниот систем.
На седницата на Комисијата за одбрана и безбедност ќе се разгледува предлог-одлука за изменување на одлуката со која се продолжува рокот за постоење на кризна состојба поради можност од нарушување на снабдувањето со нафта и нафтени деривати во земјата.
Комисијата за надворешна политика и надворешна трговија ќе ги сослуша платформите за дипломатски активности на тројца новоименувани амбасадори. Пред пратениците ќе бидат претставени кандидатурите на Илина Мангова за амбасадор во Обединетото Кралство, Стојанче Китаноски за амбасадор во Австралија и Линда Салиоска Иљазоска за амбасадор во Холандија.
Комисијата за еднакви можности на жените и мажите ќе одржи надзорна расправа посветена на спроведувањето на законите и мерките за превенција и заштита од семејно насилство, со фокус на институционалната координација, предизвиците и можностите за подобрување на постапувањето на надлежните органи.
МОЖЕБИ ЌЕ ВЕ ИНТЕРЕСИРА:
