Уапсени се две лица од Скопје под сомнение дека на 5 јули годинава го предизвикале пожарот на Јужен булевар, во близина на Рампа, на околу еден километар од центарот на градот. Во пожарот бил повреден еден пожарникар од Бригадата за противпожарна заштита на Град Скопје.
Како што соопшти Министерството за внатрешни работи, лишени од слобода се С. А. (34) и И. Х. (39), двајцата од Скопје, поради сомнение за сторено кривично дело „предизвикување општа опасност“, во напуштен објект на булеварот „Македонија“. При интервенцијата бил повреден пожарникар, а биле оштетени и две противпожарни возила.
Од МВР информираат дека се преземаат мерки за целосно расчистување на случајот, по што ќе следува соодветна кривична пријава.
Од Центарот за управување со кризи соопштија дека денес до 13:00 часот се регистрирани шест пожари на отворен простор на територијата на државата, од кои еден е активен, а пет се изгаснати.
Активен е пожарот во Општина Куманово, во местото Пармакови Ниви, каде гори сува трева.
Изгаснати се пет пожари на различни локации, меѓу кои во Општина Демир Капија во селото Прждево, каде биле зафатени две куќи, помошен објект, сува трева и нискостеблеста шума. Во Општина Ѓорче Петров, кај селото Волково во близина на Лепенец, горела депонија. Пожар бил изгаснат и во Општина Новаци во селото Новаци, како и во Општина Дебар каде горело ѓубре, а во Општина Кочани на потегот Грдовци – Мојанци исто така била зафатена депонија.
Од ЦУК најавуваат дека ќе продолжат да ја следат состојбата на терен, а надлежните служби остануваат ангажирани за целосна локализација и спречување нови пожари.
МОЖЕБИ ЌЕ ВЕ ИНТЕРЕСИРА:
