Министерот за внатрешни работи, Панче Тошковски, денеска ја посети изградбата на новата полициска станица во општина Аеродром, еден од капиталните инфраструктурни проекти на Министерството за внатрешни работи.
Новата станица е дел од поширокиот процес на модернизација на полициските услуги и подобрување на условите за работа на службениците. Во рамки на овој процес, во изминатиот период беа пуштени во употреба целосно реновирана полициска станица во Бутел, како и осум нови канцеларии за управни работи ширум државата, вклучително и новите канцеларии за граѓански услуги во објектот на МТВ во Скопје.
„Континуирано инвестираме во подобрување на условите за работа на полициските службеници и во модернизација на услугите за граѓаните. Новата полициска станица во Аеродром ќе обезбеди подобра организација на работата, повисоко ниво на безбедност и поквалитетна услуга за граѓаните“, истакна министерот Тошковски.
Според информациите од терен, градежните активности се одвиваат според планираната динамика, а објектот се очекува целосно да биде завршен до крајот на мај.
Новата станица е проектирана со главен влез за граѓаните од булеварската страна, дополнителен влез за службени потреби, 36 паркинг места, целосна канализација и заштитени гасоводни инсталации. Фасадата е речиси завршена, а внатрешноста располага со современи работни простории, посебни простории за работа со деца – жртви на насилство, изолирана оружарница, модерни сали за состаноци, магацински простории и единаесет простории за задржување со специјални безбедносни врати и прозорци.
Објектот ќе има три главни влезови – за управни служби, полициски служби и посебен притворски влез. Предвидена е и посебна просторија за препознавање, инсталирано е подно греење, а електричните инсталации и цевководите се завршени, додека финалната фаза на поставување на подовите и системот за греење е во тек.
МОЖЕБИ ЌЕ ВЕ ИНТЕРЕСИРА:
