Новите измени на Законот за заштита од пушењето, подготвени од Министерство за здравство, предвидуваат целосна забрана за пушење во затворени јавни и работни простории. Мерките се усогласени со европските стандарди и препораките на Светска здравствена организација и имаат една јасна цел – заштита на здравјето на сите граѓани, без исклучоци и без сиви зони.
Иако пушењето е личен избор, заедничкиот затворен простор не смее да биде место каде тој избор директно го загрозува здравјето на другите. Законот не се меша во одлуката дали некој ќе пуши, туку прецизно утврдува каде тоа не е дозволено, со цел да се спречат штетните последици од пасивното пушење.
Според здравствените стандарди, квалитетот на воздухот во затворени простории има директно влијание врз здравјето. Почист воздух значи помалку иритации на дишните патишта, поретки астматични напади и намален ризик од развој на хронични заболувања.
Предлог-законот изложеноста на тутунски чад ја третира како прашање на безбедност и здравје при работа, а не како прашање на личен стил на живот. Особено во угостителските објекти, каде што вработените се најдолго изложени на чад од цигари и други никотински производи, државата има обврска да обезбеди здрава и безбедна работна средина.
Искуствата од земји како Ирска и Велика Британија, кои одамна воведоа вакви забрани, покажуваат дека мерките не значат пад на приходите во угостителството. Напротив, тие водат кон поуреден, поквалитетен и попредвидлив амбиент.
Министерот за здравство, Азир Алиу, посочува дека ваквите решенија овозможуваат поголема посетеност од семејства, туристи и граѓани кои преферираат чист воздух, што на подолг рок претставува директна корист и за самите угостителски објекти.
МОЖЕБИ ЌЕ ВЕ ИНТЕРЕСИРА:
