Рускиот министер за надворешни работи Сергеј Лавров изјави дека Украина се обидела да ја нападне резиденцијата на рускиот претседател Владимир Путин во северна Русија, оценувајќи дека ваквиот потег ќе влијае врз преговарачката позиција на Москва. Украина ги отфрли обвинувањата и ги нарече целосна лага.
Според тврдењата на Русија, украински сили ноќеска лансирале 91 беспилотно летало со долг дострел кон претседателската резиденција во регионот Новгород, кои биле соборени од противвоздушната одбрана. Лавров изјави дека нема повредени лица и дека не е причинета материјална штета.
Украинскиот претседател Володимир Зеленски ги негираше руските наводи, тврдејќи дека Москва ја користи ситуацијата како изговор и дека подготвува основа за можни напади врз владини објекти во Киев. Според него, станува збор за обид да се саботираат мировните преговори.
Засега нема потврда дали Путин во моментот на наводниот напад се наоѓал во резиденцијата „Долгие бороди“, која во минатото ја користеле и советските лидери Сталин, Хрушчов и Елцин. Лавров најави дека руската војска веќе утврдила цели за можни одмазднички напади, оценувајќи го инцидентот како акт на државен тероризам.
Тој додаде дека нападот се случил во чувствителен момент, за време на разговорите за можен мировен договор за Украина, нагласувајќи дека Русија нема целосно да се повлече од преговорите, но дека нејзиниот став ќе биде повторно разгледан.
МОЖЕБИ ЌЕ ВЕ ИНТЕРЕСИРА:
