Повеќе од 20.000 лица се евакуирани од југозападниот дел на Франција поради големите шумски пожари што продолжуваат неконтролирано да се шират низ департманот Жиронда, јавува Би-Би-Си. Огнената стихија досега зафатила околу 3.400 хектари земјиште во близина на заливот Аркашон, а француските власти постојано ги прошируваат зоните за евакуација.
Првично биле евакуирани околу 12.000 жители и туристи, а подоцна на безбедно биле префрлени уште 8.800 лица. Голем дел од евакуираните се туристи кои престојувале во камповите на полуостровот Леж-Кап-Фере.
Во гаснењето на пожарите учествуваат околу 700 пожарникари, кои со часови се борат со пламените јазици во исклучително тешки услови. Префектката на Жиронда, Софи Брокас, изјави дека меѓу евакуираните има околу 10.000 туристи сместени во камповите и нагласи дека евакуацијата се одвива без поголеми инциденти и без повредени лица. Од безбедносни причини затворени се повеќе шумски патишта, туристички зони и пристапи до погодените подрачја.
Командантот на противпожарната служба во Жиронда, Марк Вермелен, предупреди дека временските услови дополнително ја усложнуваат борбата со пожарите.
„Температурите растат, а ветерот се засилува. Очекуваме многу променливи воздушни струења, што го прави ширењето на пожарот тешко предвидливо. Не смееме да ја намалиме претпазливоста“, изјави Вермелен.
Само неколку дена претходно, двајца пожарникари ги загубија животите при интервенција на друг голем пожар во близина на аеродромот во Бордо. Францускиот министер за внатрешни работи Лоран Нуњез им оддаде почит, изразувајќи сочувство до нивните семејства и колеги.
Жителите и туристите сведочат за драматични сцени. Деветнаесетгодишната Јасмина де Фреитас од крајбрежниот град Ле Порж раскажала дека чадот и мирисот на горење се почувствувале уште напладне, а до вечерта од небото паѓале пепел и изгорени парчиња кора од дрвја.
„Небото беше целосно затемнето од чадот. Моравме набрзина да го напуштиме домот и не успеавме да ги пронајдеме двете мачки и четирите кокошки“, изјавила таа.
Новинарката на Би-Би-Си, Џо Кент, која престојувала во камп во погоденото подрачје, опишала дека главниот пат на полуостровот бил речиси празен, додека туристите масовно ја напуштале областа.
Во меѓувреме, големи шумски пожари беснеат и во Шпанија и Италија. На Сицилија загина пожарникар за време на интервенција во Сан Каталдо, а властите соопштија дека на островот се регистрирани повеќе од 350 пожари, од кои десет се класифицирани како големи. Во Шпанија, жителите постепено се враќаат во селото Алморокс кај Толедо, иако пожарот сè уште не е целосно локализиран. Таму досега изгореле околу 890 хектари, додека најголемиот шумски пожар годинава, северно од Мадрид, уништил повеќе од 35.000 хектари.
Екстремните топлотни бранови што ја зафатија Европа ова лето придонесуваат за рекорден број шумски пожари. Според европската служба „Коперник“, Европа останува континентот што најбрзо се затоплува, а рекордните температури се директно поврзани со зголемениот ризик од големи и разорни пожари.
МОЖЕБИ ЌЕ ВЕ ИНТЕРЕСИРА:
