На 11 и 12 декември 2025 година, Одделот за сузбивање на организиран и сериозен криминал, во координација со СКК и ОСПО/ЕБР и под раководство на ОЈО за ГОКК, спроведе опсежна полициска акција со која беше разбиена организирана криминална група. Групата е осомничена за сторување на кривични дела „злосторничко здружување“, „лихварство“, „перење пари и други приноси од казниво дело“, како и „приредување игри на среќа без лиценца или дозвола“ согласно Законот за игрите на среќа и забавни игри.
Врз основа на претходно обезбедени наредби од Основниот кривичен суд, извршени се претреси на 11 локации во Скопје. Лишени од слобода се осум лица од Скопје, а при претресите се пронајдени и одземени околу 34.510 евра, 431.000 денари и 400 американски долари, повеќе мобилни телефони, три патнички моторни возила, компјутери, лаптопи, опрема за покер (маси, чипови, карти), документација, како и растителна и прашкаста материја.
