Обилните и интензивни врнежи од дожд што од вчера доцна попладне ја зафатија целата територија на Албанија предизвикаа поплави во повеќе градови и региони. Најкритична е состојбата во пристанишниот град Драч, како и во окрузите Лежа и Кукс, но проблеми се регистрирани и во други делови од земјата.
Според локалните медиуми, Драч е најпогодениот град, каде што во одделни населби нивото на водата на улиците достигнува и до 50 сантиметри, што ги прави патиштата речиси непроодни. Поради влошената состојба и блокадите, наставата е прекината во поголем дел од училиштата, а родителите и наставниците се повикани да избегнуваат движење додека не се стабилизира ситуацијата.
Поради силниот ветер и високите бранови, воведена е и забрана за испловување на бродови и траекти. Досега, десет семејства се евакуирани од поплавените домови и привремено се сместени во Домот за рехабилитација на Министерството за внатрешни работи.
Неповолна е состојбата и во другите окрузи, каде што се регистрирани одрони од камења и повеќе свлечишта. Дополнителни проблеми се појавија и на автопатот Драч–Тирана, каде неколку возила останале заглавени поради високото ниво на вода на одредени делници.
Министерот за одбрана Пиро Венгу соопшти дека во Драч се ангажирани армиски возила и припадници на армијата од Базата за поддршка на цивилни вонредни ситуации, како и моторни пумпи со голем капацитет за справување со поплавите. Тој упати апел граѓаните да не ги напуштаат домовите без поголема потреба.
Прекин на наставата и евакуации има и во окрузите Лежа и Кукс, каде поради искинати далноводи од силниот ветер, повеќе населени места останаа без електрична енергија.
Дополнителна загриженост предизвикува состојбата на каскадата на реката Дрим, каде трите вештачки акумулации се преполни. Надлежните веќе ги отворија портите на браните и се испуштаат околу 700 кубни метри вода во секунда, што, според медиумите, може дополнително да ја влоши состојбата со поплавите во овој дел од земјата.
МОЖЕБИ ЌЕ ВЕ ИНТЕРЕСИРА:
