Со блокирање на една лента од магистралниот пат Кочани – Штип оризопроизводителите од кочанско денеска го искажаа незадоволството од ниските цени по коишто се откупува оризот. Тие побараа праведно вреднување на нивното производство бидејќи со актуелните откупни цени имаат загуба од најмалку 50 евра по единица површина.
-Ние сме единствените производители што не бараме помош од државата, ниту субвенции, ниту друга поддршка. Нека ја добијат други, а нашето единствено барање е откупувачите да дадат по 40 денари за килограм арпа и нека си ја земат маржата од пет денари. Бараме достоинствена цена, за да живееме и да ги сервисираме основните потреби, истакна Здравко Арсов, член на Иницијативниот оброз за спас на оризопроизводството.
Претседател на Самостојниот синдикат на индивидуални земјоделски производители од Кочани Ставре Јанев, пак, рече дека зачудува фактот што нема никакви резултати од разговорите со откупувачите, со надлежните институции и со ресорното министерство.
-Пред три недели беше утврдена производната цена, што изнесува 27 денари за килограм арпа. Но, откупот се одвива по цени од 22 до 25 денари, што е недозволиво, поради што стагнира и жетвата на оризот. Во изминатите години во овој период имаше прибрано веќе половина од реколтата, а до денеска имаме ожнеано околу 10 отсто од површините. Со оглед на цените на берзите, кои скокнаа за 20 отсто, а во Италија, на пример, во овој период арпата се откупува до 2.800 евра по тон, што е историски највисока вредност, несфатливи се рекордно ниските откупни цени кај нас. , потенцира Јанев.
Оризопроизводителите најавија дека протестите ќе продолжат и во наредниот период, а дополнително ќе се координираат дали тоа ќе биде преку еден ден или најмалку еднаш неделно.
МОЖЕБИ ЌЕ ВЕ ИНТЕРЕСИРА:
