Она што започна како голема надеж и најавувана „нова ера“ на Сантијаго Бернабеу заврши брзо и болно. Реал Мадрид попладнево официјално потврди дека Чаби Алонсо повеќе не е тренер на првиот тим. Одлуката доаѓа како директна последица на поразот од Барселона со 3-2 во финалето на шпанскиот Суперкуп, натпревар кој, според шпанските медиуми, бил пресуден за конечната одлука на клупското раководство.
Иако во официјалното соопштение се наведува дека разделбата е постигната по „заеднички договор“, јасно е дека лошите резултати во последните два месеци, зголемениот притисок и немирната атмосфера во соблекувалната го забрзале расплетот. Од клубот се простија со емотивна, но воздржана порака, нагласувајќи дека Алонсо секогаш ќе остане дел од историјата на Реал и дека вратите на клубот за него ќе останат отворени.
Алонсо ја презеде клупата во јуни 2025 година како наследник на Карло Анчелоти, носејќи модерен фудбалски концепт и нова енергија. Во период од седум месеци оствари 24 победи на 34 натпревари, но серијата од пет порази од Барселона во последните шест меѓусебни дуели се покажа како неприфатлива за претседателот Флорентино Перез. Дополнителен товар беа честите повреди на клучни фудбалери и тензичните односи со некои од ѕвездите на тимот, меѓу кои и Винисиус Жуниор.
По заминувањето на Алонсо, во Мадрид веќе интензивно се шпекулира за неговиот наследник. Како најреална краткорочна опција се споменува Алваро Арбелоа, кој успешно ја води Кастиља, додека за подолгорочно решение повторно се актуелни големи имиња како Јирген Клоп и Зинедин Зидан, чии имиња сè почесто се слушаат во ходниците на „Бернабеу“.
МОЖЕБИ ЌЕ ВЕ ИНТЕРЕСИРА:
