Многумина се будат со чувство на притисок во главата, сува уста и замор, како да не спиеле доволно. Утринската главоболка често се поврзува со дехидрација, но малкумина размислуваат дека телото губи течности и додека спиеме.
Во текот на ноќта организмот природно губи вода преку дишењето и испарувањето преку кожата. Во зависност од условите во кои спиеме, температурата во просторијата и навиките, загубата може да биде значајна. Во летните месеци, особено во топли простории без климатизација, овој процес е уште поизразен.
Поради тоа, утринската главоболка понекогаш не е случајна, туку последица на недоволниот внес на течности во текот на претходниот ден.
Најчесто станува збор за тапа болка која се чувствува во челото или слепоочниците, понекогаш од двете страни на главата. Може да се засили при нагло станување или наведнување, а кај дел од луѓето постепено се намалува по внесување вода и краток период на одмор.
Покрај главоболката, знаци дека организмот можеби бара повеќе течности се сувата уста, потемната боја на урината, чувството на замор и намалена концентрација.
Иако кафето често се обвинува дека го дехидрира организмот, експертите посочуваат дека една до две шолји дневно кај повеќето луѓе немаат значаен ефект врз губењето течности. Проблемот настанува кога кафето станува замена за водата и кога во текот на денот не внесуваме доволно други течности.
Редовното внесување вода во текот на денот, особено во топлите периоди, може да помогне да се избегнат непријатните утрински симптоми и да се одржи нормалното функционирање на организмот.
МОЖЕБИ ЌЕ ВЕ ИНТЕРЕСИРА:
