Македонската фудбалска репрезентација утре ќе го одигра пријателскиот натпревар против Босна и Херцеговина во Сараево, на стадионот „Асим Ферхатовиќ-Хасе“. Иако станува збор за дуел без резултатско значење, селекцијата на Македонија ќе настапи со силно изменет состав, во кој ќе има повеќе нови имиња кои ќе добијат шанса да се докажат.
Овој натпревар за стручниот штаб и за селекторот Седлоски претставува важна можност за проверка на формата на играчите и градење на тимската игра, како и за тестирање на нови тактички решенија пред натпреварите во Лигата на нациите.
Селекторот нагласи дека главниот фокус ќе биде на пристапот, дисциплината и тимската организација, со цел Македонија да остави што подобар впечаток на теренот.
„Најважно е да излеземе на терен и да одиграме најдобро што можеме. Ќе дадеме максимум, а нека победи подобриот. Фокусирани сме на нашата игра и на тоа како ќе ги одиграме овие 90 минути. За нас нема пријателски натпревари, секогаш играме за победа и за добар впечаток“, изјави Седлоски.
Тој додаде дека натпреварите против квалитетни репрезентации како Босна и Херцеговина и Турција се важен тест за подигнување на нивото на играта и подготовка за официјалните предизвици кои следуваат.
Селекторот исто така посочи дека очекува подобра ефикасност во нападот, но и дека многу ќе зависи од противникот, поради што Македонија мора да биде тактички дисциплинирана и компактна во сите линии.
МОЖЕБИ ЌЕ ВЕ ИНТЕРЕСИРА:
