Од 08:20 часот утрово повторно е дозволено движење на тешки товарни возила на патниот правец Гостивар – Кичево преку планинскиот превој Стража, соопштија од ЈП Македонија пат.
Забраната за камиони беше воведена ноќеска во 00:25 часот поради неповолни временски услови, но по интервенција на надлежните служби таа е укината, а сообраќајот е нормализиран.
Од претпријатието информираат дека сите државни патни правци во моментов се проодни, но сообраќајот се одвива во зимски услови. Колозовите се влажни, а на одредени делници има кашест снег кој останува по расчистувањето од механизацијата.
Снег со променлив интензитет провејува во североисточниот, западниот и југозападниот дел од земјата, но засега не претставува поголема пречка за одвивање на сообраќајот. Сепак, на патишта кои минуваат низ клисури и усечени терени можна е појава на ситни одрони.
Од ЈП „Македонија пат“ апелираат до возачите да управуваат внимателно, да ја почитуваат сообраќајната сигнализација и да ја прилагодат брзината на актуелните услови на патиштата.
МОЖЕБИ ЌЕ ВЕ ИНТЕРЕСИРА:
