Околу дваесетина мажи поврзани со Германија се меѓу илјадниците поранешни борци на Исламска држава кои американската војска ги префрли од Сирија во Ирак, јавува ДПА.
Според информациите, САД префрлиле 5.700 машки борци во ирачки притворски објекти во рамки на 23-дневна операција што завршила минатата недела. Повеќето од лицата со германски врски се германски државјани, но меѓу нив има и странски државјани кои претходно имале престој во Германија пред да се приклучат на милитантната група.
Трансферите се случуваат во период на зголемени тензии меѓу сириското раководство во Дамаск и Сириски демократски сили (СДФ), кои со поддршка од САД имаа клучна улога во територијалниот пораз на Исламската држава.
Во изминатите години, илјадници борци и членови на нивните семејства беа задржани во затвори и кампови управувани од СДФ во североисточна Сирија, каде курдската администрација воспостави самоуправа. Сепак, во последните недели силите на СДФ се под зголемен притисок од владата на привремениот претседател Ахмед ал-Шара, при што се регистрирани и судири меѓу двете страни. Во одредени области, курдските сили наводно се повлекле од позициите, што отвори прашања за безбедноста на притворските центри.
Ирачкиот премиер Мохамед Шиа ал-Судани во меѓувреме ги повика земјите од Европската Унија да ги репатрираат своите државјани кои се меѓу заробените борци и да ги процесуираат во матичните држави.
МОЖЕБИ ЌЕ ВЕ ИНТЕРЕСИРА:
