Американската војска соопшти дека извела напади врз цели во јужен Иран, насочени кон локации за лансирање ракети и пловни објекти кои, според Вашингтон, се обидувале да постават мини во регионот. Операцијата била изведена и покрај важечкиот прекин на огнот меѓу двете страни.
Од Централна команда на САД наведоа дека нападите биле преземени во рамки на самоодбрана и со цел заштита на американските сили од потенцијални закани.
Портпарол на командата изјавил дека американската армија и натаму дејствува воздржано, но ќе продолжи да ги брани своите војници доколку процени дека постои опасност.
Во меѓувреме, иранското Министерство за надворешни работи објави дека во претходен американски напад врз станбена област во градот Ламерд загинале 24 лица, меѓу кои двегодишно девојче и неколку млади спортисти.
Портпаролот на министерството, Есмаил Бакаеи, преку социјалните мрежи соопшти дека нападот погодил и спортски објект, при што биле повредени повеќе од 130 лица.
Во текот на ноќта, во пристанишниот град Бандар Абас биле регистрирани неколку експлозии, по што бил активиран системот за воздушна одбрана. Причината за инцидентите засега официјално не е потврдена.
Американскиот претседател Доналд Трамп во изминатите денови изјави дека разговорите со Иран продолжуваат и дека се разгледуваат завршните детали за можен договор.
Од иранска страна беше соопштено дека е постигната одредена рамка за договор, но дека остануваат нерешени прашања кои го одложуваат конечниот договор.
Во меѓувреме, американскиот државен секретар Марко Рубио потврди дека преговорите се забавени поради несогласувања околу одредени формулации во текстот на договорот.
Говорејќи за безбедноста во Ормускиот Теснец, Рубио порача дека пловниот коридор мора да остане отворен за меѓународниот сообраќај и трговија.
Иранските власти засега немаат официјален коментар за најновите американски напади, додека државните медиуми во земјата ги оценија како нарушување на договорениот прекин на огнот.
МОЖЕБИ ЌЕ ВЕ ИНТЕРЕСИРА:
