СВР Куманово поднесе кривични пријави против Ф.Ф. (52) и Л.Т. (52), двајцата од Куманово, поради сомнение за сторување повеќе кривични дела поврзани со уништување на културно наследство, бесправно градење, узурпација на недвижности и несовесно работење во службата.
Според информациите од Министерството за внатрешни работи, првопријавениот во 2023 година срушил и уништил куќа која претставувала заштитен објект на културното наследство, на која била поставена спомен-плоча на народниот херој Киро Нацев Фетак.
Објектот бил евидентиран како заштитено културно наследство согласно законските прописи и бил дел од програмата за одбележување значајни личности и настани во Општина Куманово.
По уривањето, пријавениот како инвеститор изградил објект од втора категорија без претходно одобрение за градење од надлежниот општински сектор за урбанизам, со што, како што се наведува, постапил спротивно на Законот за градење. Објектот бил изграден и на државно земјиште.
Втората пријавена, која работела како овластен градежен инспектор, е осомничена дека несовесно ги извршувала службените должности. Таа донела решение врз основа на нецелосно и неточно утврдена фактичка состојба, иако била должна тоа да го направи согласно законските прописи за инспекциски надзор.
По целосно документирање на случајот, против двете лица се поднесени кривични пријави до надлежното обвинителство.
МОЖЕБИ ЌЕ ВЕ ИНТЕРЕСИРА:
