Закани по живот преку испратено писмо вчера добил државниот Јавен обвинител Љубомир Јовески, информира денеска македонското Јавно обвинителство. Во соопштението се наведува дека заканата била содржана во препорачана пратка експедирана од Пошта Битола на 17.1.2022 година во 10:26 часот.
-Препорачаната пратка со заканата е напишана на македонски и на англиски јазик. Заканата се однесува на конкретен кривичен предмет по кој постапката е завршена во декември 2021 година, со тоа што во предметот е донесена Резолуција со која постапката е запрена бидејќи е утврдено дека нема место за јавнообвинителско постапување. Заканата, како што се наведува во писмата, е од терористичка организација која се бори и убива за неправда и нејзините членови се подготвени да гинат за целите на организацијата, се наведува во соопштението објавено на интернет-страницата на ЈО.
Во него се наведува и тоа дека Јавниот обвинител истакнува дека се залудни ваквите закани.
-Тој во и во оваа прилика нагласува дека заканите, па дури и да се по живот нема да го поколебаат во примената на законите и во професионалното и одговорно постапување на Јавното обвинителство, се наведува на крајот на соопштението.
Пратката ќе биде доставена до МВР заради испитување на содржината на наводите и лицето кое ја експедирало.
Според наведеното во писмото, чија фотографија ја објави ЈО, Јовески ќе биде убиен ако не ги ослободи од обвинение двајцата новинари од телевизијата Алфа – Горан Момировски и Драган Милосављевиќ. За тој случај Јавното обвинителство веќе ја запрело постапката бидејќи е утврдено дека нема место за јавнообвинителско постапување.
