Не го признава Ерусалим за главен град Израел
Палестинците ја поздравија одлуката на Австралија да го повлече признавањето на Западен Ерусалим како главен град на Израел, потег на Канбера што наиде на остри критики од израелските лидери.
„Ја поздравуваме одлуката на Австралија за Ерусалим и нејзиниот повик за решение со две држави согласно меѓународното право“, објави на Твитер палестинскиот министер за цивилни работи Хусеин ал Шеик.
Тој го пофали „тврдењето на Австралија дека идниот суверенитет над Ерусалим зависи од трајното решение засновано врз меѓународното право“.
Шефицата на австралиската дипломатија Пени Вонг, најавувајќи ја промената на политиката на лево-центристичката австралиската Влада, рече дека одлуката за статусот на Ерусалим треба да се донесе во рамки на мировни преговори меѓу Израел и Палестинците, а не еднострано.
„Нема да поддржиме пристап што го поткопува решението за две држави. Австралиската амбасада отсекогаш била и останува во Тел Авив“, рече таа.
Премиерот на Израел Јаир Лапид ја нарече „избрзан одговор“ таквата одлука на Канбера.
„Ерусалим е вечната и обединета престолнина на Израел и тоа нема ништо да промени“, се наведува во соопштението од Кабинетот на Лапид.
Во 2018 година конзервативната влада на Австралија предводена од Скот Морисон, го следеше примерот на тогашниот американски претседател Доналд Трамп и го призна Западен Ерусалим за главен град на Израел.
Таквиот потег наиде на негодување во Австралија и доведе до затегнување на односите со соседна Индонезија, земја со најголемо муслиманско население во светот, привремено нарушувајќи го билатералниот договор за слободна трговија.
И Палестинците и Израелците го присвојуваат Ерусалим, а повеќето од државите одбиваат да го признаат за главен град на било која од двете страни.
МОЖЕБИ ЌЕ ВЕ ИНТЕРЕСИРА:
