Викендот донесе зголемен сообраќаен метеж на граничните премини кон Грција, а најголеми гужви денеска се забележани на граничниот премин „Дојран“.
Од Авто-мото сојузот на Македонија информираат дека времето на чекање за излез од државата на овој премин изнесува околу 30 минути. Од граничниот премин потврдуваат дека уште од раните утрински часови биле формирани неколкукилометарски колони, кои во текот на денот постепено се намалуваат.
„На македонска страна се чека од 20 до 30 минути, додека на грчката страна задржувањата се двојно подолги. Најголема фреквенција има во раните утрински часови, а нов бран возила се очекува по 18 часот, кога туристите почнуваат да се враќаат. Традиционално, најголеми гужви има за време на викендите и на датумите кога се менуваат туристичките аранжмани, како 20 и 30 јули, 1 и 10 август“, велат од ГП „Дојран“.
Според податоците на Министерството за внатрешни работи, засилена фреквенција е регистрирана и на граничниот премин „Богородица“. Од вчера до денеска напладне од државата излегле 6.100 македонски државјани, а влегле 2.022. Во истиот период Македонија ја напуштиле 15.871 странски државјанин, додека влегле 7.878 лица.
Зголемен сообраќај е забележан и на граничниот премин „Табановце“, каде во државата влегле 17.448 странски државјани, а излегле 14.872. На влез се евидентирани и 9.958 македонски државјани, додека 3.174 ја напуштиле земјата.
Од МВР информираат дека се ангажирани сите расположливи човечки и технички капацитети за забрзување на протокот на патници, во рамки на задолжителните гранични контроли.
Според АМСМ, освен на „Дојран“, задржувања има и на граничниот премин „Табановце“, каде за влез во државата се чека околу 20 минути, додека на останатите гранични премини нема подолги застои.
МОЖЕБИ ЌЕ ВЕ ИНТЕРЕСИРА:
