Официјална протестна нота до Бугарија поради последната изјава на европратеникот Ангел Џамбаски кој упати навреди на адреса на премиерот Димитар Ковачевски и изрази отворени територијални претензии, ќе прати министерот за надворешни работи, Бујар Османи.
Тој денеска изјави дека Џамбаски ги надминал сите граници на провоцирање.
-Иако се обидувавме да го игнорираме, овојпат ги надмина сите граници на провоцирање.Според сите меѓународни и билатерални договори има основа да се реагира до бугарската држава, бидејќи искажува територијални претензии и навредлив говор, рече Османи.
Бугарскиот европратеник Ангел Џамбаски вчера во видео-обраќање пред картата на „Голема Бугарија“ жестоко реагира на изјавата на премиерот Димитар Ковачевски дека не го познавал кој е тој и дека македонизмот секогаш ќе го има.
– Ако добро се сеќавам, Ковачевски ги носеше кафињата додека траеја средбите на бившите премиери Бојко Борисов и Зоран Заев. Носеше папки, работеше некои бирократски работи, нешто како машка секретарка. Тоа е задачата на сите исполнувачи на туѓа волја. Тој е само фасада, тој ја исполнува волјата на Белград и на Кремљ. Ние Бугарите сме дел од Европската унија, а вие србоманите не сте, рече Џамбаски.
Министерот Османи најави дека ќе го отвори со Софија и прашањето за настапите на претседателот на бугарската историска комисија, Ангел Димитров, како и тоа за отворањето на бугарските клубови со надвредливи имиња. Притоа оцени дека не му е јасна целта на ваквите провокации бидејќи не се на штета само на македонските граѓани туку и на штета на бугарската заедница, место да го искористи договорот со Бугарија да се етаблира подобро во земјата.
-Дури помислив дека трета страна е инволвирана во тоа и дека таа сака да ни ги расипе односите со бугарската заедница во државава, порача Османи .
Тој побара време да добие повеќе детали околу информацијата за затворање на македонскиот клуб во Благоевград пред да излезе и да коментира.
МОЖЕБИ ЌЕ ВЕ ИНТЕРЕСИРА:
