Кај двајца новопримени професионални војници на обука во касарната „Алексо Демниевски Бауман“ во Велес е дијагностицирана кожната болест шуга (scabies), соопшти Канцеларијата за воени односи со јавноста при Генералштабот на Армијата, во соработка со Министерството за одбрана.
Како превентивна мерка, сите војници кои се на обука во Командата за обука и доктрини привремено се пуштени дома. Освен двајцата кај кои е потврдена болеста, останатите треба да се вратат во касарната во понеделник.
Од Армијата информираат дека, во координација со Воено-медицинскиот центар, се преземени сите потребни мерки за спречување на евентуално ширење на заболувањето и дека се спроведува епидемиолошки надзор согласно препораките на стручните служби.
Надлежните посочуваат дека сместувањето и хигиенските услови се организирани според армиските правила и стандарди, а пред приемот на војниците била извршена дезинфекција на просториите и била обезбедена чиста постелнина. Капењето на војниците, како што наведуваат, се спроведува организирано и плански.
Во соопштението се потсетува дека во изминатиот период во касарната во Велес биле реализирани активности со повеќе од 300 новопримени војници, како и меѓународната вежба „SEVEN STARS 2025“, додека на армискиот полигон Криволак се одржала и вежбата „Immediate Response 25“ со над 2.200 припадници на домашни и странски вооружени сили. Во ниту една од тие активности, според Армијата, не била евидентирана појава на ваков тип заболување.
Од Министерството за одбрана велат дека постапуваат согласно насоките на Воено-медицинскиот центар и дека ќе бидат преземени соодветни мерки.
МОЖЕБИ ЌЕ ВЕ ИНТЕРЕСИРА:
