Православните верници денеска го одбележуваат еден од најголемите христијански празници – Света Троица, познат и како Духовден или Педесетница, кој се слави педесет дена по Велигден и десет дена по Спасовден.
Празникот е посветен на слегувањето на Светиот Дух врз апостолите, настан што според христијанското учење претставува исполнување на Христовото ветување дадено по неговото Вознесение. Според Евангелијата, Светиот Дух се спуштил врз учениците на Христос, давајќи им сила и дар да зборуваат различни јазици, со цел да го шират христијанското учење меѓу народите.
Света Троица го добила своето име затоа што на овој ден се открива целосното присуство на трите лица на Светата Троица – Светиот Отец, Синот и Светиот Дух. Со слегувањето на Светиот Дух врз апостолите, според христијанската традиција, е завршено основањето на Христовата Црква, поради што празникот често се смета и за нејзин духовен роденден.
Во православниот календар, Духовден има особено значајно место и се вбројува меѓу најголемите празници, веднаш по Велигден и Божиќ. По тој повод, во храмовите ширум земјата се одржуваат свечени богослужби, на кои верниците се молат за духовен мир, благослов, здравје и сила.
Првиот ден од Педесетница е посветен токму на евангелскиот настан – слегувањето на Светиот Дух врз апостолите, со што започнала нивната мисија за ширење на христијанската вера низ светот.
МОЖЕБИ ЌЕ ВЕ ИНТЕРЕСИРА:
