Привремената влада на Венецуела прогласи седумдневна национална жалост за припадниците на армијата кои загинаа во американскиот напад врз Каракас, изведен со цел апсење на авторитарниот лидер Николас Мадуро.
Одлуката ја соопшти вршителката на должноста претседател, Делси Родригез, во обраќање на државната телевизија, нагласувајќи дека загинатите „ги положиле своите животи во одбрана на државата и суверенитетот“.
„Одлучив да прогласам седумдневна национална жалост во чест и спомен на младите жени и мажи кои ја жртвуваа својата иднина во одбраната на Венецуела“, изјави Родригез.
Според официјалните информации, најмалку 24 војници загинале во нападот што беше извршен рано наутро во саботата. Венецуелските вооружени сили соопштија дека станува збор за „директна воена агресија“ и објавија фотографии од загинатите припадници на армијата.
„Дваесет и четири ѕвезди од нашето боливарско небо беа згаснати од кукавичка империјалистичка рака“, се наведува во соопштението објавено на Инстаграм профилот на вооружените сили.
Нападот предизвика нова ескалација на тензиите меѓу Венецуела и Соединетите Американски Држави, а меѓународната јавност внимателно ја следи понатамошната разврска на настаните.
МОЖЕБИ ЌЕ ВЕ ИНТЕРЕСИРА:
