Претседателката на Република Македонија, Гордана Сиљановска-Давкова, примила претставници на граѓанската иницијатива „Стоп за Усје“, кои ги образложиле своите ставови за влијанието на цементарницата Усје врз квалитетот на воздухот и здравјето на граѓаните.
Претставниците ја истакнале потребата од воспоставување мерни станици со 24/7 мерење на загадувачките супстанци, целосна транспарентност на добиените податоци и усогласување со препораките на Светска здравствена организација за граничните вредности на ПМ10 честичките. Тие споделиле и компаративни примери од други држави каде параметрите се пониски од македонските.
Како што информира Кабинетот на претседателката, иницијативата истакнала дека наместо да се ангажираат приватни акредитирани лаборатории, процесот на акредитација на државната лабораторија треба да се забрза. Тие очекуваат поголема институционална поддршка и доследно и транспарентно исполнување на законските обврски во интерес на заштитата на животната средина и здравјето на граѓаните.
Претседателката Сиљановска-Давкова, пред сè како граѓанка, ја споделила загриженоста за загадувањето на воздухот, почвата и водите, истакнувајќи го ова како едно од најгорливите прашања. Таа ги сослушала аргументите на граѓаните и нагласила дека внимателно ги следи нивните активности насочени кон поздрава и побезбедна животна средина, што го смета за врвен национален приоритет.
Сиљановска-Давкова потсетила дека во Советот за безбедност го именувала професорот и научникот од областа на метеорологијата и климатските промени, д-р Спиридонов, за да придонесе кон решавање на овие прашања.
Соговорниците се согласиле дека животната средина е заедничка одговорност и стратешка определба и дека е потребен континуиран дијалог меѓу граѓанските организации, институциите и стопанските субјекти за создавање одржливи и долгорочни решенија. Исто така, било истакнато дека Собранието треба, согласно Деловникот, да обезбеди учество на граѓанските организации во расправата за законите и вршењето на надзорната функција.
МОЖЕБИ ЌЕ ВЕ ИНТЕРЕСИРА:
