До 17:00 часот, на повторените избори за градоначалник што денеска се одржуваат во општините Врапчиште, Гостивар, Центар Жупа и Маврово и Ростуше, своето право на глас го искористиле вкупно 32.547 граѓани. Тоа претставува излезност од 25,39 отсто од вкупно запишаните 128.286 гласачи, покажуваат податоците објавени на веб-страницата на Државна изборна комисија.
Гласањето се одвива на вкупно 215 избирачки места. Највисока излезност е регистрирана во Врапчиште, каде до 17 часот гласале 7.984 гласачи, односно 29,28 отсто од запишаните. Во Гостивар гласале 20.887 лица, што претставува 25,23 отсто излезност.
Во Центар Жупа на гласање излегле 934 гласачи, односно 12,35 отсто, додека во Маврово и Ростуше гласале 2.742 лица, што е 25,93 отсто од вкупниот број избирачи.
Согласно Изборниот законик, на повторените избори не е потребна минимална излезност од една третина од гласачите. За избор на градоначалник е доволно еден од кандидатите да добие повеќе од половина од гласовите на излезените избирачи, правило кое важи и за Центар Жупа, каде што во трката има само еден кандидат.
МОЖЕБИ ЌЕ ВЕ ИНТЕРЕСИРА:
