Неотповиклива оставка на функцијата денеска поднесе директорот на градското јавно претпријатие „Паркови и зеленило“ Ангеле Сотировски. Во објавата на негодиот профил на Фејсбук Сотировски, кој доаѓа од Социјалистичката партија, наведе дека новиот амбиент во Градот Скопје нема да му дозволи успешно менаџирање.
-Ценам дека новиот политички амбиент во Град Скопје нема да ми дозволи максимално да се фокусирам на најважното а тоа е успешно менаџирање на претпријатието. Токму поради тоа, се повлекувам од должноста в.д. директор, напиша Сотировски.
Во објавата тој ги наведе резултатите коишто се постигнати во работата на ова градско претпријатие во текот на изминативе девет месеци откако беше избран за директор. Тој наведе дека претпријатието било во тешка финансиска состојба но и покрај тоа се успеало да се подигаат нови зелени површини во градот.
Ова е нова оставка од редовите на директорите на градски јавни претпријатија по судирот кој настана меѓу скопската градоначалничка Данела Арсовска и партијата ВМРО-ДПМНЕ. Претходно, оставки поднесоа директорите на ЈП „Градски паркинг“, на „Дрисла“, „Улици и патишта“, а ВМРО-ДПМНЕ објави дека веќе нема никаква врска со Арсовска којашто беше поддржана од нивна страна на ланските локални избори.
МОЖЕБИ ЌЕ ВЕ ИНТЕРЕСИРА:
